SIBU: Siku lelaki ke mukut sampai parai pangan indu iya tiga taun dulu, diletak ukum jil 15 taun ulih Court Tinggi ditu, kemari.

Pesuruhjaya Ngakim Dr Hamid Sultan Abu Backer ke mending kes tu merintah saspek Zaidi @ Udin Muslimen bejalaika ukum nya berengkah ari haribulan iya ditangkap, iya nya 9 April 2005.

Nitih bacha kes, suspek didawa ngujungka pemati pangan indu iya Julia ukai enggau niat tauka ukai sengaja di KM39 Teku/Pasai Siong kena 1 Januari 2005, entara jam pukul 12 tengah malam ngagai 5 pagi.

Dalam penyalah tu, suspek didawa baruh Genteran 304(a) Tusun Ukum ke ngungkupka ukum jil ngagai 20 taun.

Nitih bacha kes, suspek bisi nedat belakang pala tudah pangan indu iya ngena pengunchi stering tauka ‘stering lock’ lebuh maya iya balat ngeransi lalu terus ninggalka tudah indu nya kediri ba alai nya taja pan indu nya nadai nemu orang sereta apin ngeleda.

Bangkai tudah indu nya ditemu telentang ba tengah jalai alun ulih mensia mayuh kena 1 Januari 2005, urung pukul 7 pagi.

Udah bekau nerima pemadah, seraban polis betuaika ASP Denis Leong mujur nangkap suspek ba Jalai Keppel, Bintulu kena 9 April 2005, urung pukul 1.05 ngalih hari.

Tasat ke dipejalaika polis bisi nemu pengunchi stering ba babas enda jauh ari bangkai tudah indu nya ditemu kena 11 April 2005, ke dipelaba dikena dalam kes munuh nya. Peresa ke dipejalaika kena 31 Januari di Sepital Sibu ulih Lutor A Savior Selva Suresh, netapka tudah indu nya parai tegal balat bakal ba pala.