KOTA SAMARAHAN: Lapan iti universiti ari menua tu enggau menua luar udah madahka diri deka sama enggau ngerebut Piala Kepala Menteri ba pengawa Tanda Universiti Borneo renggat kedua ba Universiti Teknologi MARA (UiTM) Sarawak Kampus Kota Samarahan, ditu belabuh ari 27 ngagai 29 Ogos tu ila.

Tuai UiTM Sarawak, Profesor Madya Dr Jamil Hamali madahka gerempung tanda ka deka masuk ba pengawa tu nyengkaum Universiti Malaysia Sarawak (Unimas), Universiti Malaysia Sabah (UMS), Universiti Putra Malaysia (Kampus Bintulu), Universiti Tun Abdul Razak (Unitar), UiTM Sabah enggau UiTM Sarawak empu.

Kelimpah ari nya, universiti menua luar ke deka masuk ba pekit tu nya Universitas Tanjung Pura, Pontianak (kala nyadi champian lalu benung megai gelar nya) enggau Universitas Mulawarman, Samarinda. Dua iti universiti tu datai ari menua Indonesia.

“Festival Tanda Borneo ti diatur dua taun sekali tu kena mantu perintah ngintu sereta ngerembaika agi adat enggau main asal bansa,” ku iya madah ba aum media ba Kampus UiTM Sarawak ditu, kemari.

Sama bisi datai, Sapit Tuai Nembiak UiTM Sarawak Abdul Jalil Lob enggau sekeda raban spunsa bukai, Sapit Pengarah Yayasan Sarawak Samat Junai enggau Menijer Besai Celcom Malaysia Berhad Norrida Yusuf.

Dr Jamil madah, kelimpah ari ngerembaika adat enggau main asal, pengerami tu mega meri peluang ngagai sida ti bisi pengerindu ba tanda begerempung, betukar penemu sereta kreatif ngintu bemacham-macham tanda.

Iya madah, kelimpah ari nyambung adat enggau main asal ba renggat universiti, pengawa tu nya disadang ulih ngangkatka menua Sarawak nyadi siti palan dagang temuai ti bisi mayuh macham bengkah tanda enggau pupu raban bansa.

Dr Jamil mega madah, champian pekit deka nerima prais piala pusingan Kepala Menteri Pehin Sri Abdul Taib Mahmud kelimpah mata duit RM5,000 Lumur dua enggau tiga mai pulai mata duit RM3,000 enggau RM2,000 kelimpah ari prais ke sida ti menang koreografi ti pengabis manah enggau gari ti pengabis manah.

“Kelimpah enggau nya, UiTM Sarawak deka ngatur Seminar Seni Budaya kena 27 Ogos tu,” ku iya.

Pengerami tanda tu ila deka dibuka Menteri Pemansang Sosial enggau Urbanisasi Dato Sri William Mawan Ikom lalu ditutup Taib empu.