Semua IPT di menua Sarawak sama begempung nyadi siti konsortium ke nimang pemansang SCORE

KOTA SAMARAHAN: Universiti Malaysia Sarawak (Unimas) diberi pengarap bejalaika pengawa U-SCORE, siti konsortium ke meri pemansang ngagai Koridor Kuasa Tau Dikena Baru Sarawak (SCORE).

Naib Canselor Unimas, Prof Dr Khairuddin Ab Hamid, madah konsortium tu ari institusi pelajar tinggi ba serata menua Sarawak.

“U-SCORE deka ngelatih sereta ngeluarka orang gawa bisi pengelandik kena nipak peminta ba SCORE lalu bejalaika pansik bekait enggau beratika pengawa ngemujurka koridor pemansang tu.

“Baka ke udah ditemu kitai, SCORE tu inisiatif projek pemansang menua tengah Sarawak,” pia ku iya lebuh bejaku ba hari penudi Konvokesyen Unimas ditu, kemari.

Dr Khairuddin madah, pengarap ti udah diberi ngagai Unimas tu siti pengawa ke mai pemanah ngagai universiti nya ba pengawa pansik ngelama tu.

Kelimpah ari nya iya madah, tu nyadi tanda pengarap ke diberi ngagai universiti tu nempa orang gawa bisi pengelandik ke relevan nitihka pemansang menua Sarawak enggau menua Malaysia.

“Ba pengawa Unimas ngajar bala nembiak iya pasal revolusi global ke balat amat ngungkat diatu, kami nemu pengawa tu patut diangkatka kena meri kelala Unimas ngagai orang mayuh di dunya tu.

“Diatu meh maya iya Unimas bebendar agi ngangkatka diri ngagai tikas entarabansa, lalu kena ngamatka juluk ati iya, mayuh pengawa diatu benung diatur,” ku iya.

Dr Khairuddin madah kena ngamatka tuju tu, mayuh sempekat pemereti ati udah disain kena neritka agi kaul enggau pengawa dua tuju besai Unimas enggau institusi pelajar tinggi entarabansa.

“Ba pengawa tu bisi mega diatur betukar nembiak universiti enggau kerejasama akademik sereta universiti ari luar menua ASEAN, Amerika Syarikat, Eropah, Jipun enggau Australia,” ku iya.

Dr Khairuddin mega madah, Unimas diatu benung ngaluska projek pemansang infrastruktur udah projek pemansang iya masuk renggat kedua.

“Unimas diatu mega benung ngaga pelin siti bilik besai kena pengawa perintah baka konvokesyen, Pusat Islam, Kompleks Sukan lalu tiga bengkah fakulti baka Fakulti Ekonomi dan Perniagaan, Fakulti Sains Sosial, Fakulti Perubatan enggau Sains Kesihatan,” ku iya.

Kelimpah ari nya, 656 iku graduan nerima degree sida iya kemari enggau 82 iku ari Fakulti Perubatan dan Sains Kesihatan, 148 iku graduan Fakulti Sains Sosial, 75 iku ari Fakulti Sains Komputer enggau Teknologi Maklumat, lalu kelebih nya ari Fakulti Sains Kognitif dan Pembangunan Manusia.

Chermin Lembaga Pengarah Unimas, Tan Sri Datuk Amar Bujang Mohd Nor nyuaka degree ngagai bala nembiak ari univeristi nya.