SIBU: Bala mensia mayuh ke ngena jalai alun ari Sibu ke Julau, Durin enggau Kanowit minta orang tauka opis ke empu tanggung pengawa ngagai jalai alun nya, kelebih ari entara Jembatan Batang Rajang ba Durin ngagai padang bilun Sibu ngambika ngadu enggau lengkas jalai ke balat jai nya.

Siku bala mayuh ke ngena jalai nya tang enda ngasuh nama iya disebut ditu, ngena emel ke dianjung iya ngagai Utusan Borneo ditu, madah jalai ke mayuh lubang besai sereta enda rata nya balat endar ngemedis orang ke nengah jalai nya.

Berita Iban di Kuching mega bisi nerima kemplin ari siku pemesai opis perintah ke madah iya ngadu kerita iya lebuh pulai Gawai tu tadi ari Kanowit lebih ari RM400 laban jalai kelalu jai entara jembatan Durin ngagai simpang Julau.

“Bebadi amat kami sebilik laban jalai ke ngenyai nya. Udah nengah jalai nya, nyau bekesetak, bakakiuk munyi kerita empa pemalat iya jai laban jalai nya ke enda tembu-tembu, lalu diteju bakanya aja,” ku pemesai nya ke mega minta nama iya enda disebut ditu. Kelimpah nya, jalai nya ukai mina ngerusakka kerita pemesai opis perintah nya tadi aja, tang kerita mit enggi bala mensia mayuh di Kanowit enggau Julau sereta sebarang orang ke nengah jalai nya endang mayuh jai, kelebih agi muak ari baruh kerita laban jalai bebatu kering, belubang sereta bisi ba sekeda alai endur, nya betingkah-tingkah.

Tudah ke ngirum emel ngagai Utusan Borneo ditu madah, jalai ba senentang menua ke disebut nya betambah jai laban hari ke majak nadai ngetu ujan kenyau ari seminggu tu ke udah.

Nya alai, ku iya, opis ti relevan, ti bempu tanggung pengawa nya patut jampat ngemutarka penanggul nya, taja pan jalai nya dalam proses benung diangkatka tikas pemanah.