Mensia mayuh dipinta nentuka sungai lepas ari pengamah ngambika terus beguna besai: Harden

SRI AMAN: Rayat mayuh enda tau enda nemu sereta mereti pasal pemeresi sungai dalam nyaga pengidup utai idup ba sungai nya, kelimpah ari nyadi penatai ai beresi ungkup diguna kitai mensia.

Menteri Muda Pemansang Tanah Francis Harden Hollis madah, ulah ngemeranka pemeresi sungai mesti dijadika siti peneleba sereta pekara ke riri dikereja kitai siku-siku, lalu ambi kitai nyadi adat asal diri kena nentuka utai ke idup dalam sungai baka ikan, undang enggau utai tumbuh bukai ke begunaka ai sungai beresi kena sida terus idup meruan, lalu ngambika rebak baru dudi hari ila terus sama ensepi penguntung agi bisi ikan enggau undang dalam sungai nya.

“Nya alai pengawa ngatur Karnival Ikan Bulu dikarapka ulih kena neleba ngambi bala mensia mayuh riri enggau ulah nyaga pemeresi sungai lalu betanggungjawab ngagai pengidup pengeraja asal ulih kitai ari ai sungai di Menua kitai tu,” ku Harden lebuh bejaku ba Pengerami Nutup Karnival Ikan Bulu Batang Lupar, Jiran Muda 2008 di Tebing Sungai Batang Lupar ditu, malam kemari.

“Ulah kitai ke ngemeranka pemeresi pengidup kitai empu, mega deka nentuka sungai lepas ari pengamah, lalu enggau nya terus nyamin pengeraja asal dalam ai baka ikan, undang sereta utai tumbuh dalam ai kelimpah kitai mensia empu ke begunaka ai sungai ti beresi ka irup enggau kena nyendia pemakai,” ku Harden.

Iya mega madah sungai mega besai endar guna kena dijadika sistem pengangkut dalam menua tu, kelebih agi di menua ulu, nya alai pemeresi iya enda tau enda dijaga enggau manah.

“Serimbai enggau tu, sungai kitai ke beresi sereta manah dipeda deka ngerindu sereta ngenyenangka ati semua bala kitai, kelebih agi bala mensia mayuh ke bepanggai ba ai sungai ambi nyadi ai irup sereta kena kitai bejalai kulu kili,” ku Harden.

Karnival Ikan Bulu Batang Lupar diatur Opis Serakup Menua enggau Integrasi Nasional (OSMIN) Sitak Sri Aman, Komiti Pengempung Kandang Rukun Tetangga (KRT) Sitak Sri Aman berakup enggau Opis Residen Sri Aman.

Ku Harden nambah, karnival nya mega siti ari pengawa ke ditaga diatur serimbai enggau sambut pengerami Sarawak 45 Taun Merdeka Dalam Malaysia.

“Aku ngarapka atur program baka karnival tu ulih semampai dipejalaika dudi hari ila, lalu ukai mina serimbai enggau sambut pengerami tauka atur bukai.

“Ungkup bala kitai di Sri Aman, Sungai Batang Lupar endang naka pemesai guna taja pan numbas pemalat dikena dalam pengawa berangkut kulu kili laban tebal agi kampung enggau genturung pendiau baka rumah panjai diatu bisi datai jalai alun.

“Tang taja pia, iya tetap nyadi pekara ti narit sereta ngumpan ati dagang temuai, kelebih agi enggau fenomena benak iya ke mina bisi ditemu nyadi dalam 19 iti batang sungai di serata dunya tu,” ku menteri muda nya.

Nyadi serimbai tu, baka Pesta Benak ke endang diatur ninting taun,

Karnival Ikan Bulu mega deka bisi awak nyadi produk dagang temuai sereta siti chara kena ngerupitka kaul enggau gempung ati entara mensia mayuh di menua ditu.

“Program bakatu endang ngena amat dijadika siti ari atur pengawa serimbai sambut Sarawak 45 Taun Merdeka Dalam Malaysia baka dalam taun tu.

“Atur baka pekit ngulih ikan bulu ke diselit nyadi siti pengawa dalam karnival tu endang ngena amat enggau peneka sereta pengagit ati bala mensia mayuh di menua ditu, di nengeri tauka ari menua ulu,” ku iya.

Lebuh ke bejaku, Harden mega madah menua Sarawak jauh amat udah mansang sereta berubah manah ba gaya pendiau enggau ba pekara bukai baka politik, sosio-ekonomi kenyau ari taun 1963 suba.

“Dalam kandang 45 taun ke udah, mayuh endar kandang menua ke udah berupai mansang dalam mayuh sukut segi, baka ari sosial, ekonomi enggau fizikal baruh pegai ketuai baka Kepala Menteri Pehin Sri Abdul Taib Mahmud,” ku iya.

Nyadi karnival tu tadi alai ngatur mayuh bengkah pengawa ke ngerinduka ati baka pekit ngenchura gambar, pekit karaoke, pengayan mit sekeda entuka, pekit nginti, pekit ngulih ikan bulu, pekit lumba perau injin enam kuda ke baruh, pekit pam ski, pekit raban band musik enggau bantai main asal.

Sama bisi datai ba pengerami nya pengari rayat kerusi KN Lingga Simoi Peri, Pengarah OSMIN Sarawak Rajali Mudin, Residen Sri Aman Abang Shamshuddin Abang Seruji, DO Sri Aman Mahri Sapawi enggau ketuai OSMIN Sitak Sri Aman Mohamad Yusli Nassir.