Bala Iban dipinta nguna manah web tu ngambika tau bulih penguntung

BINTULU: Atur mungkal laman web komuniti Iban pengabis dikerindu bala mayuh ditu, iya nya www.ruaikitai.com dikarapka ulih mai penguntung besai ngagai raban bansa, kelebih nya bala raban bansa Dayak.

Raban bansa Dayak dipinta ngena awak bisi laman web nya ngiga pelajar ari nya, laban iya bisi ngundan penemu ke manah ungkup bala nembiak kena nyungkakka pemanah pelajar sekula sida.

Chermin laman web nya Martin Entamin mansutka jaku nya ba siti pengerami Ngiling Tikai ke diatur kelab www.ruaikitai.com ba Pegari Gallery Cafe di Tanjung Batu apin lama.

Entamin ke nyadi tuai pengabang pengerami nya, minta bala mayuh ngena laman web www.ruaikitai.com nyadi siti pengenjing penyurai kena raban bansa Dayak ngiga sereta ngumpul penemu dalam dunya globalisasi kelimpah ari betukar penemu enggau runding enggau pangan diri.

“Aku minta bala kaban laman web tu ngambika ngena iya enggau naka pemanah kena belajar sekeda pekara ke ulih ngangkatka penemu diri empu sereta pemansang sekeda isu kemaya haritu kelimpah ari ke rindang kediri ngabas laman web tu,” ku iya.

Enggau tu Menijer Pegari Iban Production (PIP), Johnny Chuat, tembu bendar ati meda pemanah sambut bala mayuh ngagai bala mensia mayuh ke nyadi kaban kelab www.ruaikitai.com enggau nyadi kaban laman web nya baka ke ngelamatu.

“Aku meri besai terima kasih ngagai bala sida ke nyadi kaban www.ruaikitai.com lalu laban kami tu kompeni ke mayar ungkus operasi laman web, aku ngarapka mayuh agi deka sama enggau masuk nyadi kaban kelab enggau laman web nya,” ku iya.

Ku iya, laman web nya siti portal forum komuniti ke disediaka ulih PIP enggau pechuma.

Ngenang pasal Pegari Gallery Cafe iya nya alai pengerami bejadi laman web nya enda lama da agi, iya ukai siti pab tauka palan beperindang, tang siti galeri enggau kafe moden ke ngayan sereta promosi rengka tauka barang lama enggau antik sereta mega barang moden ari raban bansa Dayak nyengkaum kraf, poster, gambar, utai dero enggau klip video.

“Bala sida ke datai ngagai alai tu dudi ila bisi awak belelak sereta meda klip video enggau gambar slaid ke ngayanka sekeda barang ke bisi diayanka kami ba galeri serimbai enggau muai aus tauka pengelapar ngirup sereta ensep pemakai ke bisi dijual kami ba kafe nya,” ku iya.

Iya mega ngarapka galeri sida tu ila ulih meri publisiti ngagai Menua Sarawak enggau nengeri Bintulu laban iya bisi konsep nyelaie sereta gaya enggau pemanah kediri empu.

“Galeri tu siti galeri raban bansa lalu bisi nyendia servis internet pechuma ka bala temuai, ke alai dua iti komputer rumpas disediaka kena akses ngagai internet, awakka bala ke datai kia ulih meresa emel sida, ebanking, mayar bil sereta macha berita pengabis dudi ‘online’,” ku iya nambah.

Ka tambah nya, bala sida ba galeri nya deka ngajar bakani bala temuai ulih mayar bil tauka servis bukai ngena internet enggau pechuma.

Bisi 300 iku bala kaban www.ruaikitai.com ke datai ari Labuan, Semenanjung enggau serata Sarawak enggau ngulu pengerami nya.

Pegari Gallery Cafe tu siti ari kompeni pegai PIP, ke mega ngaga majalah jaku Iban, iya nya Senawah enggau Pegari.