KUCHING: Sarawak betunga enggau penanggul kurang sukarelawan ba Rejimen Askar Wataniah, ku Chermin Jawatankuasa Pendukung Askar Wataniah (Jakpaw) Datuk Amar Wilson Baya Dandot.

“Pemayuh sukarelawan patut ditambah dalam kandang ke udah ditetapka,” ku Baya, ke mega Sekiteri Besai Perintah Menua.

Atur jalai perintah nentuka tipak 1:1 entara sukarelawan enggau raban tetap Askar Wataniah sebedau taun 2010.

Ba Malaysia, dipelaba bisi lebih kurang 50,000 iku sukarelawan lebih ari 80,000 iku raban ke tetap. Entara taun taun 2011 enggau 2019, dipelaba atur nipak sukarelawan tetap deka nambah ngagai 2;1 lalu udah taun 2020, 3:1.

Ba Sarawak, bisi dua buah Kem Askar Wataniah ke besai. Siti ba ‘Kem Sri Rajang’ ba Sibu lalu siti agi ba ‘Kem Ria’ ditu.

Bisi 2,008 iku sukarelawan udah ngerijista sida iya empu ba Kem Sri Rajang lalu 2,910 ba Kem Ria.

“Raban Jakpaw enda tau enda meri komitmen kena ngangkatka enggau narit minat orang mayuh enggau Askar Wataniah,” ku Baya.

Askar Wataniah nyukung pengawa ngetanka menua Malaysia. Orang mayuh nyukung Angkatan Tentera Malaysia lalu betanggungjawab ba pengelikun maya dituntung penusah.

Baya nambah: Aku ngasuh raban Jakpaw ngereja pengawa sida iya enggau efektif agi awakka ulih ngangkatka pengawa sida iya enggau manah ngagai pengelikun menua tu,” ku iya.

Sama bisi datai ba aum nya pagi kemari, ke diatur ba Wiama Bapa Malaysia ditu, Leftenan Kolonel Jasvinder Singh Al Naranjan Singh, Kaban Kunsil Nengeri Jepak Datuk Talip Zulpilip enggau Kaban Kunsil Nengeri Tasik Biru Peter Nansian Ngusie.

Sebedau aum tu, Nansian dipadu enggau pingat Mejar Kehormat.