Mata duit ungkup lumba sekali tu nambah RM80,000 ari taun ke udah

KUCHING: Regata Sarawak taun tu udah nambahka perais mata duit ngagai RM230,000 bebanding enggau RM150,000 taun nyin tadi. Tu nyengkaum sida ke menang taun tu deka nerima perais ari lumur satu ngagai lumur lima.

“Taun tu perais mata duit kena pengawa tu udah nambah ari RM150,000 ngagai RM230,000 ke taun tu. Taun nyin tadi, sida ke nerima perais, semina sida ke bulih lumur satu ngagai lumur tiga aja, tang taun tu sida ke menang deka nerima ari sida ke bulih lumur satu ngagai lumur lima,” ku Residen Bagi Kuching, Rodziah Morshidi madah maya aum media pasal pengawa tu ke diatur ari 1-3 Ogos tu ila, ke becherminka Menteri Pengawa Dagang Temuai, Dato Sri Wong Soon Koh.

Rodziah madahka, datai ke diatu bisi 283 tim enggau 5,393 raban bebanding enggau 398 iti tim enggau nyau ka 6,000 raban taun nyin suba, ke deka enggau belumba maya Regata Sarawak tu ila, lalu taja pan timpuh ngerijista udah lalu, tang sida ke agi deka ngerijista agi tau nganjung nama sida iya.

Kelimpah ari 15 macham lumba ke sebaka enggau taun nyin tadi, bisi tiga iti kategori ke diberi kelala taun tu, iya nya lumba bekayuh entara pelilih menua (inter-state), lumba bekayuh entara nembiak universiti (Inter-varsity) enggau lumba bekayuh entara opis perintah enggau sektor swasta.

“Kami bisi mega dipadah sekeda universiti ba menua tu, ngasuh nembiak sida iya sama enggau ba pengawa lumba ke diatu agi nganti sida nganjung nama,” ku iya.

Sekeda 15 bansa lumba, ke deka enggau belumba baka lumba bekayuh kategori tujuh iku lelaki, kategori 10 iku indu bekayuh, kategori 15 iku bekayuh lelaki enggau indu, 15 iku bekayuh kategori lelaki, 20 iku bekayuh kategori lelaki, 30 iku bekayuh (ngerebut tropi TYT Yang Di-Pertua Negeri), 20 iku bekayuh entara pelilih menua (inter-division) kategori lelaki, 30 iku bekayuh kategori VIP lelaki, 30 iku bekayuh kategori hotel enggau tour agencies lelaki enggau indu, 20 iku bekayuh kategori entarabansa, 15 iku bekayuh kategori temuai ari menua luar, kategori perau tambang (ngena injin enggau bekayuh), kategori kayak, kategori Jet Ski Open Class Below 800cc enggau kategori Jet Ski Open Class Unlimited.

Sekeda program ke bisi nambah kelimpah ari belumba bekayuh nya, Pameran kraft (Pameran Kraftangan Malaysia), Main tradisional baka niti senyulong – batang pinang, bepalu ngena panggal ba atas titi, belumba nangkap itit enggau bekayuh adab betentang dalam siti perau enggau Trade Fair.

Entara sida ke bisi nyuaka spunsa, iya nya Perbadanan Perusahaan Kemajuan Kayu Kayan Sarawak (STIDC) ke bisi spunsa 800 iti baju – T kena lumba tu, Water Genesis ke bisi spunsa ai mineral dalam kandang lumba nya enggau Nestle ke spunsa utai diirup ke orang mayuh ke bisi meda lumba nya.

Spunsa besai pengawa tu ke udah nyuaka spunsa dalam mata duit, Shell Berhad ke udah spunsa RM100,000, Petronas Malaysia Berhad RM50,000, TM (Telekom Malaysia Berhad) RM50,000, Ta Ann Holding Sdn Bhd RM30,000, Global Upline RM30,000, Murphy Sarawak Oil RM30,000 enggau Cahya Mata Sarawak RM25,000 ke semua penyampau RM685,000.

Program tu ila deka diayan ba televisyen Program Astro enggau Program Malaysia Hari Ini. Ba Program Astro, kompeni besai tu udah meri awak ngayanka program tu enggau pechuma, 60 minit.

Mayuh orang ke enggau lumba tu ila datai ari menua pegai BIMP-EAGA ba menua Asia tu baka ari menua tu empu, Indonesia, Brunei, Singapura, Thailand enggau Filipina. Menua Australia dipelaba deka enggau lumba tu taja pan bedau mutus sida iya datai ke enda.

Sama bisi datai ngagai aum media nya, Majlis Tindakan Pelancongan Sarawak Mohd Tuah Jais, Menijer Besai Petronas Wilayah Sarawak, Mosir Hamid, Telekom Malaysia Berhad, Wan Zainuddin Wan Abdullah, Pengarah Urusan Global Upline, Datuk Mohd Daniel Abong enggau ari Murphy Sarawak Oil, Mohamad Rushdi Rosli ke diatur ba ditu, kemari.