KUCHING: Bisi 70 peratus indai tunggal ke ngerijista ba Persatuan Ibu Tunggal Sarawak (PITSA) ditu mayuh orang ke biak ke sarak ketegal penanggul ekonomi, ku presiden iya, Salmah Ibrahim.

Iya madah, penyampau nya dipeda majak nambah lalu mayuh entara sida tu berumur entara 18 ngagai 30 taun.

“Enti suba, penyampau raban ke mayuh diterima ari sida ke balu tang diatu nadai agi baka nya.

Ku iya, kelimpah ari penanggul belanja, bisi sekeda sida butang enggau pangan diri ngujungka iya sarak.

“Mayuh ke ditemu kami madah ngesal ati belaki tumu, beguai deka belaki sereta nadai kereja udah belaki,” ku iya madah.

Lebuh bejaku pasal pengawa PITSA mantu sida tu, Salmah Ibrahim madah: “PITSA sedia mantu pelajar anak sida, nyukung ari segi moral lalu nyungkak ekonomi sida iya.

“Bisi maya iya, kami mega ngasuh sida tu enggau kami ngereja pengawa ke bisi dipejalaika kami.”

PITSA bisi 6,000 iku raban enggau 27 pampang ba menua tu.

Dalam gerempung tu, sida iya ngemeratka bala balu, janda, indu ke tinggal laki, indu ke bisi anak tang nadai laki sereta indu ke bisi laki enda dapat.