Suku taun tu asil nambah 7.7 peratus bebanding enggau taun ke udah

KUCHING: Kumpulan Wang Simpanan Pekerja (KWSP) madah penguntung sida bulih RM4.11 biliun ba tiga bulan keterubah (S1) 2008 .

Ketuai Pegawai Eksekutif KWSP Datuk Azlan Zainol madah penguntung tu ari prestasi ke manah ba labur ekuiti S1 2008 ke bedau di audit.

Iya madah penguntung RM4.11 biliun nya nambah 7.7 peratus bebanding enggau tiga bulan keterubah taun nyin tadi.

Azlan madah penguntung ari ekuiti niki ngagai RM1.06 biliun, nambah 51.2 peratus bebanding RM698.21 juta ba S4 2007.

“Utai ke mantu KWSP bulih untung tu ari lun enggau bon ke bisi RM1.59 biliun enggau Sekuriti Perintah Malaysia (SKM) ke udah nambah RM1.24 biliun.

“KWSP selalu berati dalam labur ekuiti kelebih agi lebuh ekonomi dunya ke enda nentu ke ninggang taun 2008.

“Taja pia, nengah chara ngurus portfolio ekuiti ke manah, KWSP mujur bulih penguntung ari saham-saham ke udah meri penguntung ke tinggi,” ku iya.

Prestasi S1 2008 ngayanka labur ekuti fokus ba dua sektor iya nya wang, dagang enggau servis.

Kategori baru dalam portfolio labur ekuiti KWSP, Dana Dagangan Bursa (ETF) ke bulih 0.2 peratus penguntung ari penyamoau ke dilabur.

“Kami selalu ngiga chara bukai lalu muka peluang labur ke manah enggau profil risiko KWSP,” ku iya.

Azlan madah enggau saiz dana KWSP ke datai ba RM320.81 biliun, 39.1 peratus dana nya dilabur ba lun enggau bon lalu 32.4 peratus agi dilabur ba SKM.

Lalu ba lun enggau bon, iya madah, 85.4 peratus dilabur ba kompeni ke begred tinggi ke ba renggat AAA enggau AA nambah mimit, iya nya ba 0.5 peratus bebanding tiga bulan keterubah sebedau tu.

Ke lebih nya, 14.6 peratus udah dilabur ba kompeni ari kategori ba renggat bukai.

“Timpuh mansau iya ulih diambi, SKM agi baka selama, 60.9 peratus chukup timpuh taun diambi dalam timpuh satu ngagai lima taun, 31.1 peratus chukup timpuh tau diambi dalam timpuh enam ngagai 10 taun lalu 8.0 peratus chukup timpuh tau diambi dalam timpuh 11 ngagai 20 taun,” ku iya.

Azlan mega madah, ungkup labur KWSP kelebih agi meri fokus ngagai instrumen penguntung tetap, iya nya SKM, lun enggau bon ke nadai mayuh berisiko.

“KWSP deka terus ngungkup dana nya nitihka strategi ke manah kena nyaga duit ke disimpan sida kaban ke udah pinchin,” ku Azlan.

Bekait enggau pekara tu, iya madahka KWSP selalu komited nyamin lalu nambahka duit ke udah disimpan kaban KWSP nengah chara ke pengabis manah ba labur enggau chara ngurus korporat.

“Nyadi siti organisasi ke befokus ba kaban-kaban iya, KWSP ngangkatka pengawa ke manah ke profesional enggau jampat kena nyamin pengelikun kaban enggau alai sida iya gawa ke udah berejista.

“KWSP mega deka terus ngereja pengawa sida nyadi chunto pemansang ekonomi menua nitihka penuduk iya nyadi siti institusi alai nyimpan duit ke tebilang ba Malaysia,” ku iya.