Bala ketuai raban bansa patut ngereja pengawa enggau penuh komitmen

SRI AMAN: Menteri Muda Pemansang Tanah Francis Harden Hollis minta bala ketuai raban bansa bejalaika tanggungjawab ke diberi ngagai sida ulih perintah enggau penuh komitmen sereta pemagas kena nentuka bansa Dayak terus nyingkang maju ke mua.

Harden madah, ketuai raban bansa ke nyengkaum bala tuai rumah, pengulu, pemancha enggau temenggong patut bejalaika tanggung pengawa sida enggau penuh komitmen sereta besai tanggungjawab ngambika pulai ka penguntung rayat sereta mega perintah sebarang maya, ari pun ngagai ujung.

“Perintah sebedau tu udah nyiri sereta madu megai pengawa lalu meri elawin ngagai bala ketuai raban bansa ngichaka sida ulih bejalaika tanggungjawab sida enggau manah kena mantu bala tuai perintah Barisan Nasional (BN) ngemansang sereta ngemajuka menua tu.

“Kena enggau manah elawin ke diberi perintah nya bejalaika pengawa kita enggau manah. Anang enda bebendar bejalaika pengawa perintah ke diberi ngagai kita (ketuai raban bansa) lalu mesti nyeliah ari ulah mina berunding ka diri empu aja, laban kitai patut gawa ka penguntung semua rayat,” ku iya.

Menteri Muda nya ke mega Kaban Kunsil Nengeri kerusi Simanggang mansutka jaku nya lebuh bejaku bejadi Pengerami Ngiling Bidai Hari Gawai 2008 ke diatur ulih Gerempung Ketuai Raban Bansa Iban Pelilih Sri Aman ba Dewan Suarah Sri Aman apin lama.

Ka tambah nya Harden madah, ketuai raban bansa patut semampai mereti sereta kiruh deka nemu pasal sekeda isu enggau gaya utai ke nyadi ngelingi sida awakka lebih mudah sida ulih ngenatai sereta pemadah nyadung pemadah ngagai bala nembiak redak enggau rayat baruh pegai enggau kemata sida.

“Kelimpah nya mega, sida ketuai raban bansa mega ngerinan tanggung pengawa ngenataika sekeda penanggul ti ditapi ulih bala nembiak baruh pegai sida ngagai perintah enggau lengkas ngambika ulih diberi perati sereta diputarka enggau naka penyampat.

“Enti sida mujur bejalaika tanggung pengawa sida enggau manah, aku nemu tikas pengidup bala rayat di pesisir kelebih agi bala kitai Dayak sigi ulih disungkakka tinggi agi ari diatu ngagai jemah ila,” ku iya.

Sama bisi enggau ba pengerami nya Kaban Parlimen Sri Aman, Masir Kujat, chermin Gerempung Ketuai Raban Bansa Iban Pelilih Sri Aman, Pemancha Samuel Lawen sereta enggau bala ketuai raban bansa ari sebelah pelilih menua tu.

Ba pengerami nya Harden seduai Masir sama ngerah madah meri agih siku-siku penyampau RM5,000 ngagai gerempung nya kena sida bejalaika sekeda pengawa sida ti nguntungka raban bansa.