Rega minyak ke majak niki deka ninggang orang mayuh laban semua utai beguna minyak memagang

KUCHING: Rega minyak ke niki tu pekara ke serius ke ninggang orang mayuh kelebih agi sida ke diau di menua pesisir.

“Minyak nyadi siti komoditi ke berat, semua utai ke diguna kitai begunaka minyak memagang baka tinso, injin api…semua bepanggai ba minyak.

“Rega minyak ba menua ulu pan mar, segilin engka bisi RM10, RM14. Laban rega minyak ke niki ngasuh mayuh orang tusah, penatai pemisi menua ulu enda niki, rega minyak tu tadi makai pemisi sida iya. Reti nya duit ke kena sida iya meli pemakai, diatu udah diambi minyak, bisi utai kurang, produktiviti tau kurang” ku Ketuai Publisiti Sarawak Dayak National Union (SDNU), Dr John Brian Anthony ba pengawa “Workshop on Impacts of Fuel Hike on the Rural Communities” ke diatur SDNU ditu, kemari.

Kelimpah ari peniki rega minyak, chara bukai ke nyeliahka pangka tu, orang mayuh ke diau ba menua pesisir begunaka penemu baru.

“Siti teknologi ke bedau dikena kitai — empang mit. Iya enda mar. Kitai di menua ulu mayuh wuong. Sungai enda kala ditekat, ulih kena musinka pila mit kena ngasingka delimo (dinamo).

“Tau mega minta bantu perintah tauka NGO nulung orang menua ulu, sida tau mai penemu tu ngasuh menua ulu nyingkang jauh agi ila, lebuh sida nemu guna mini hidro dam tu ke ulih dikena nyadi kuasa kitai di menua ulu din,” ku iya.

Iya mega madah, peniki rega minyak enda ulih dikelaung ke orang mayuh, laban endang sekayu dunya rega minyak udah niki. Taja pia, iya madah laban kitai nadai nemu ni maya minyak nya tau abis ila, kitai semua kelebih agi orang ke diau ba menua pesisir enda tau enda ngatur tusun pengawa, ke patut diatur kitai diatu.

Orang ba menua pesisir, patut nukar penemu ngasu, berikan, begumpul lauk ari kampung, ari sungai, laban semua utai tu ila deka punas, laban orang ke ngereja kayu, bala jelu deka punas, sungai keruh lalu bisi sekeda sungai berachun.

“Enti kitai enda ngubah pendiau kitai diatu, kitai ukai semina merinsa agi, tang tau dikategori nyadi orang ke seranta. Bansa kitai ke diulu din, kitai enda tau enda berunding ngemansangka tanah betanam awakka ulih dijual lalu mai penguntung ngagai kitai.

“Enti tua nanam padi diatu, rega beras manah, enti nuan nanam sawit rega manah, rega getah rega manah.

Kebuah iya manah, laban semua utai tu baka getah enggau kelapa sawit, ulih digaga nuan minyak enggau getah tiru laban rega minyak ke mar diatu,” ku iya.

Baka ba rumah panjai, sekeda sida ke diau dia bisi tanah alai sida iya ulih ngereja pengawa betanam. Anthony madah ngagai orang mayuh ke diau ba menua pesisir ngambi peluang ngaga pengawa tu enggau besai, ngaga utai tu penatai pemisi sida iya, ku iya.

Iya nambah, perintah ke ngaga menua tu menua tu nyadi “tibang padi”, siti pekara ke manah.

“Beras begunaka teknologi, teknologi kitai diatu baka ke agi nungku, ngetau agi ngena jari, uyut….enti kitai bedandang, enti kitai nusun pengawa bumai besai, dia kitai tadi betambak ngena injin, ngetau ngena injin, nungku ngena injin, dia kitai ulih bumai dua kali setaun, hari tu kitai bisi penatai pemisi ke manah.

Semina ke nyadi penanggul, teknologi tu mar,” ku iya, ke mega bisi madah bekebun sawit pan begunaka belanja ke tinggi laban begunaka pengangkut.

“Perintah meri bajet ngagai orang ke diau ba menua pesisir, ukai diengkah kitai kena ngaga dinding, atap sing, jembatan…ukai utai ke bansa nya tuju iya, penatai pemisi patut diadu dulu.

“Nya alai, dalam renggat kitai ke diatu kena kita ngelaungka tanah mit kelekit, dia kitai mest betanam, nya alai kita bedua duit ukai bedua tanah. Kitai ulih ngangkatka produktiviti ari tanah sama besai baka nya. Pangka ari rega barang niki, kitai mesti nemu nusun pengawa kitai ke pagila …pengawa ke enda ulih dipeda kitai,” ku iya, lebuh ditemu ba Seminar, kemari.

Iya madah pemayuh sida ke datai ngagai seminar nya, umbas iya laban sekali tu sida ke enggau seminar tu ari Sarawak Dayak National Union, Sarawak Dayak Graduates Association, Dayak Chamber of Commerce Industry, enggau raban NGO bukai.

“Sekali tu mayuh gempung Dayak bukai nyukung pengawa kami tu, lalu penemu ke udah pansut tu lagi deka digempuru ka kami, ditempa, udah ditempa, diangkatka ngagai orang ke bisi kuasa… dibagi ngagai tiga bengkah, perintah ke megai kitai, perintah ke bejalaika pengawa opis perintah, enggau perintah pusat ngambika penemu tu tadi ulih bejait ari perintah pusat engau perintah menua,” ku iya.