SIBU: Sambut pengerami Gawai Dayak berupai nyadi batang perati ba nengeri Sibu berengkah ari dua tiga hari tu ke udah, kelebih agi sehari kemari, lebuh mensia mayuh berebut nepan muto tambang kena pulai ke rumah enggau menua asal diri empu.

Endang baka taun-taun ke udah, raban bansa Dayak ke bekereja di luar menua tu, baka di Semenanjung Malaysia sigi sama enggau orang berebut deka datai jampat di menua diri nyambut Gawai begulai enggau diri sebilik ke lama udah enda enggau betemu.

Gaya perati Utusan Borneo kemari ba Terminal Pesinjir Sibu (TPS), iya nya penyangkai lumur satu ungkup muto ekspres ke Kapit enggau Kuching, nemu terminal nya penuh sekut bepadat empa pemayuh mensia ke betatam nganti muto ekspres kena sida bejalai ngagai menua diri, ke ili enggau ke ulu.

Taja pan balat sekut kenyau ari pukul 5 dini hari kemari, tang nadai penanggul laban bisi orang nyaga sereta ngemata, kelebih agi bala raban ari Lembaga Sungai-Sungai Sarawak (LSS) ke nadai pungkang ngemata ba alai nya.

Kelimpah ari LSS, sama mantu ngemata sereta nyaga orang mayuh dia mega bala Opis Tasik, Polis Marin, Opis Penyaga Rayat Mayuh (JPA3) sereta Opis Menteri Dagang Dalam Menua enggau Pekara Pengguna (KPDNHEP).

Nunda padah, siku orang gawa LSS ke ditanya pemberita ba terminal nya, pemayuh mensia ba TPS kemari balat sekut sereta bepadat agi bebanding enggau hari dulu, lalu dianggar bisi lebih kurang 5,000 pesinjir betatam nganti ba terminal nya.

“Kemari, lebih kurang 4,000 pesinjir ngena terminal lalu penyampau tu dipelaba betambah pagila (31 Mei),” ku iya sereta madah penyampau pukul rata pesinjir genap hari baka selama urung 1,000 iku.

Pengari bejaku nya, ke enggai ditulis nama ditu madah, kenyau ari terminal dibuka pukul 5 pagi kemari, mensia mayuh lalu

terus berumban tama ngagai terminal nya laban sida ke begaut deka nepan muto ekspres kena pulai ke menua diri empu.

“Taja pan sekut, tang ulih kontrol,” ku iya sereta meri pengaga ati ngagai bala staf ari opis bukai ke sama mantu nyaga sereta ngemata gaya utai ba terminal nya, lalu nentuka semua bejalai enggau manah.

Nyadi LSS endang udah bejalaika operasi sida kenyau ari 24 Mei ngagai 31 Mei tu sereta ari 6 ngagai 8 Jun tu. Kelimpah ari betati ngemata gaya mensia mayuh ba TPS enggau terminal pesinjir ke bukai enda jauh ari nya, operasi nya mega nyengkaum sengkang ba Batang Rajang entara Sibu enggau Kapit sereta entara Kapit enggau Belaga.

Nitih padah staf LSS nya agi, sida mega meri kemendar ngagai orang ke bejalaika muto ekspres nya nambah penyuah enggau penyampau sida bejalai enggau nyendia muto eskpres tambah ke Kapit enggau Song.

“Tu ngambika bala pesinjir ke betambah ampit penuduk ba muto ekspres nya memagang, ba dua iti pejalai enggau destinasi gagai sida nya,” ku iya sereta nambah bisi tiga buah muto ekspres ke udah disedia sida, lalu penyampau nya dipelaba betambah.

Gaya peda surat berita tu, agi mayuh bendar ke agi berebut ngulih tikit ekspres, tang sida gaya ke puas ati, laban tikit nya agi bisi ulih beli sida.

Serimbai enggau nya, iya mega minta bala sida ke bejalaika muto ekspres nya enda ngundan pesinjir lebih ari muat sida, lalu enda nikika tambang.

“Kami mega minta bala mensia mayuh enda nepan muto ekspres ke kelalu sarat, lalu minta sida anang ngelanggar atur pengelikun,” ku iya nambah agi.