SIBU: Penyampau eksiden ba jalai alun makin betambah belama beduduk ari ulah driba sereta orang bukai ke ngena jalai nya enda beratka pengelikun, kelebih agi datai ba maya bisi rami.

Ketuai Polis Pelilih (KPD) Sibu ACP Shafie Ismail lebuh bejaku ngagai Utusan Borneo kemari, nerang madah bala polis sigi balat irau sereta berat endar ka penanggul eksiden jalai alun ke majak betambah.

“Pekara tu nyengala kenyau ari 1 Januari ngagai Mei taun dulu, ke alai bisi sepuluh iti eksiden naban nyawa dirikot. Lalu ka tambah nya, dalam taun tu bisi 14 iti kes betambah ari taun dulu dalam kandang timpuh ke sama,” ku iya.

Nya alai tegal nya, bala polis deka semampau merati gaya pemayuh enggau penyuah penanggul belantak ba jalai alun ngichaka iya ulih turun tauka dikurangka, laban meda penyampau nya ke majak betambah.

Shafie mantai pekara nya serimbai enggau atur program kimpin pemereti ati ngena jalai alun ke diatur begulai ulih Opis Menteri Pengangkut, Raban See Hua (See Hua Daily News, Borneo Post enggau Utusan Borneo), Indu Opis Polis Pelilih Sibu enggau Kelab Lions Mandarin Sibu ke diatur ba Pintu Kuta Sibu, pagi kemari.

Ngenang pasal Ops Sikap, iya madah Ops Sikap engka deka berengkah dipejalai ari seharitu ngagai 3 Jun ila, laban nya kena merati gaya orang ke bejalai ba jalai alun, ngambika meri pemereti ati tentang pemesai guna pengelikun jalai alun.

“Bala polis ari Indu Opis Polis Pelilih Sibu, kelebih agi ari Unit Trafik udah ngelala sereta netapka sekeda stisin alai sida merati sereta ngipa enggau stratejik bala orang ke enda nitih adat tauka ngelanggar atur ngena jalai alun. Polis ukai mina merati sereta ngiching kerita mit, tang semua kerita besai enggau mit diperati magang, kena ngemeranka pengelikun,” ku Shafie.

Iya minta bala mensia mayuh anang enda bejimat sereta betati belama nengah jalai alun serimbai enggau pejalai pulai ke menua maya sambut pengerami Gawai tu, ngambika datai enggau likun ba menua digagai sida.

“Bala mensia mayuh dipinta semampai bejimat sereta betati belama lebuh pansut ari rumah, tentuka pintu bekunchi sereta tau madah ngagai bala polis ke ngeraun ngambika nadai pengachau tauka penanggul nyadi,” ku iya ngelalau.

Ka tambah nya, mensia mayuh mega dipinta ngemai kerita belubah sereta bejimat lalu anang mai kerita enti ngelu pala tauka mabuk. Sida mega dipinta meresa kerita dulu sebedau bejalai jauh.

Ngenang pasal penyampau ulah jenayah ba maya bisi pengerami, Shafie madah amat bisi kes ngeruntun beg ke alai mata duit RM30,000 diripot lenyau dalam kes nya kena hari Satu tu tadi.

KPD nya madah, penchuri pintar amat, laban ngena awak maya bala orang mayuh tengan balat gagau sereta kiruh bebeli barang kena ngintu Gawai Dayak ke sehari dua agi deka nyadi, lalu maya mensia bebaika duit mayuh bebeli barang ti mayuh mega.

“Nya alai tegal tu, nadai kebuah enda bejimat sereta penuh perati ba kelingi diri empu. Ulah jenayah ngeruntun enggau ngeruk kuchik selalu diripot nyadi maya bala mensia mayuh tengan gagau sereta kiruh bebeli barang kena begawai,” ku iya ngelalau.

Serimbai enggau kimpin mayuh stika kerita enggau lambar surat berita Utusan Borneo, The Borneo Post enggau See Hua Daily News diagih ngagai bala driba kerita enggau sida ke mai mutosikal.

Sama bisi datai Sapit Chermin Opis Kunsil Bandar Sibu (MPS) Daniel Ngieng, Menjier Operasi The Borneo Post Phyllis Wong, Sekiteri Politik ka Kepala Menteri Andrew Shilling Bangit enggau Temenggong Adrian Ringgau.