KUCHING: Perintah menua besai udah dipadahka ngambika nulung Sarawak ngurangka peninggi kos berangkut pemakai kelebih agi ngagai menua pesisir.

Sapit Kepala Menteri Datuk Patinggi Tan Sri Alfred Jabu madah kemari, enti ulih di atur, tu tau ngurangka pemerat ke ditapi orang di menua pesisir enggau rega barang ke majak niki kelebih agi beras.

“Kitai enggai ngasuh rega barang ke majak niki ngenusah orang ba menua pesisir. Nya alai, kami udah minta perintah menua besai nulung kami ngurangka kos awakka rega barang ba menua pesisir ulih di terima sida ke diau ba endur nya, kelebih agi ba alai ke pedis ngiga pengangkut,” ku iya madah ngagai sida ari surat berita udah nyuaka tulung kena Hari Gawai ngagai 54 iku tuai bilik ke seranta ba Dewan Hun Nam Siang Tng , Jalai Sekama ditu.

Jabu madah perintah menua besai benung mansik peminta ari menua tu, lalu iya madahka iya ngarap bisi atur deka di kena nyeliahka penanggul nya.

Iya nambah, iya mega bisi minta mayuh agi beras ba rega ke udah di beri subsidi Bernas Corporation di anjung ngagai menua tu.

“Aku endang arap sida iya deka ngemeratka peminta tu, lalu aku nemu sida iya endang deka nulung kitai. Aku udah berandau enggau kedua iku menteri ari Opis Menteri pengangkut enggau Opis Menteri Dagang Dalam menua enggau Pekara Pengguna. Aku ke nyadi menteri ke ngemata pemansang menua pesisir, aku ngadang deka ke Kuala Lumpur tiap kali deka bejaku ke pekara tu ” ku iya.

Kelimpah ari nya, Jabu madahka enda nyamai ati enggau sekeda orang ba menua tu ke selalu bejaku jai pasal perintah menua.

Iya nusuika orang ke nganjung pesan ke pandak (SMS) nengah talipaun binching, madahka iya raya sakit, tang ke bendar iya sigi gerai.

Iya madahka, SMS nya di anjung ulih orang ke enda betanggungjawab ke ngaga cherita bula laban deka ngasuh orang mayuh irau enggau kelam kabut.

“Tuhan aja nemu aku tu endang gerai endar. Kita ke ari Surat Berita meda pengerai aku. Aku gagau berap minggu tu ke udah, bejalai ngagai seluruh menua Sarawak, aku ba Betong berapa hari tu ke udah, udah nya ngagai Bau enggau Lundu lalu aku agi gawa pagila,” ku iya.

Taja pia, iya enggai madah sapa orang ke nganjung SMS nya, tang semina iya madah orang tu kepapas, ke enda nyamai ati meda pengawa perintah ngemansang ka menua tu.

Lebuh nyuaka pemeri Hari Gawai, iya madahka tu pengawa ke selalu di kereja ninting taun ba Kuching, ke di atur begulai enggau Hun Nam Siang Tng, siti gempung ke nulung orang mayuh ke seranta, lalu ke nyadi Chermin iya, Dato Tay Thian Siong.

Iya madahka, seduai iya Tay ngatur pengawa ngulihka bantu nulung orang ke seranta, ke ari nya tiap iku tuai bilik nya nerima RM50 enggau barang dapur bukai baka beras, dagin babi, manuk, minyak masak, meehoon, mee, gula, sugar, ruti, ai irup bukai, ai gis, pemakai dalam tin enggau telu.