Udah bisi jaku madah orang nya ari sektor korporat

KUCHING: Datuk bandar baru Bandaraya Kuching Selatan (MBKS) dipelaba deka dipadu ujung bulan tu. Bisi jaku ke madah datuk bandar ke baru datai ari sektor korporat megai pengawa nya ba MBKS.

Bisi sekeda orang madah, datuk bandar ke baru tu siku orang korporat ke benama ke bisi peneleba ba industri berumah, lalu sekeda madah Datuk bandar ke baru nya orang ke gawa ba kompeni ke bisi bekait enggau perintah.

Taja pia, datuk bandar ke baru tu tetap ari komuniti Cina ke selalu dipadah perintah.

Pengawa nya lama kusung udah niang Chong Ted Tsiung ke udah dalam bulan Ogos 2007, ke nyadi datuk bandar ke terubah iya ke nadai bekait enggau politik. Mohd Amin Hassan nyadi Pemangku datuk bandar ke diatu.

Kemari, Menteri Rampa Menua enggau Pengerai Orang Mayuh, Datuk Michael Manyin, ke betanggungjawab ba perintah pelilih menua tu, nadai nyakal datuk bandar ke baru tu orang ke ari sektor Korporat.

Iya madah ngagai sida surat berita pasal chalun nya, “engka ukai” orang ke gawa ba perintah. Lebuh ditanya enti orang nya ari sektor korporat, Manyin madah, “Asai aku, iya.”

Manyin madah kabinet menua tu deka ngemutuska sapa ke deka dipadu nyadi datuk bandar. “Ila kita meda sapa, udah Aum Kabinet Menua 29 Mei tu ila. Aku udah dipadah, nama orang tu udah di beri ngagai sida ke patut milih,” ku iya ke lalu madah Datuk bandar nya lelaki.

Lebuh di tanya nama kebuah nganti endur datuk bandar nyau pengelama iya, baru ngiga, Manyin madah iya ngarapka pekara nya enda di sebut agi. “Udah kabinet mutuska sapa, aku deka meri surat padu ngagai orang nya,” ku Manyin.

Orang mayuh ke selalu betanya sapa deka di padu nyadi Datuk bandar MBKS nganti niang Chong ke udah nadai tegal sakit riman. Iya nyebut ari berita ke kala pansut suba, madahka datuk bandar ke baru tu deka dipadu dalam bulan November 2007.

Mayuh nama kala di sebut orang ke di padah deka nganti datuk bandar ke udah, nyengkaum siku pengarah ke gawa ba opis perintah, siku kaban kunsil nengeri ke udah alah bepilih besai enggau siku orang ari opis pengawa dagang temuai.

Kepala Menteri Sarawak, Pehin Sri Abdul Taib Mahmud kala madah ngagai sida surat berita 5 Oktober taun nyin tadi, iya udah ngasuh Sekiteri Menua Datuk Amar Wilson Baya Dandot ngiga chalun datuk bandar.

Iya bisi madah orang ke patut dipadu nyadi datuk bandar, orang ke nadai mayuh pengawa politik ke berat.

“Pengawa MBKS tu pengawa pugu menua ngintu komuniti. Aku ngiga nama orang tu ke ulih ngereja pengawa nya ba MBKS, ke bisi ‘pay’ nyadi ketuai ke manah lalu enda kelalu berat ba politik,” ku iya.

Taib enda nyakal orang ke udah lama gawa enggau perintah baka Chong, deka dipilih nyadi datuk bandar, tang dalam randau pemberita 14 Oktober tu tadi, iya mega nadai nyakal enti orang nya mega orang ari korporat.

Pengawa datuk bandar selalu disi chalun ari Parti Rakyat Bersatu Sarawak (SUPP), sebedau Chong ngambi endur nya dalam bulan September 2006. Maya nya Chong agi gawa ba Jabatan Alam Sekitar dan Sumber Asli.

Datuk bandar keterubah iya suba, Datuk Song Swee Guan megai pengawa nya ari bulan Ogos 1988 ngagai Januari 2006, ditangkan Chan Seng Khai (Februari 1997-Julai 2006). Chan badu ari udah iya alah maya bepilih besai ba Batu Lintang dalam taun 2006.

Lebuh niang Chong megai pengawa nya suba, iya bisi penguntung ba dua piak ari segi politik, ke nyadi orang ke manah enggau orang, nyamai dibai berandau lalu bisi runding ke selalu deka mansang.

Taja pia, pengawa datuk bandar tu ke nyadi chap politik MBKS, opis kunsil nya agi bempu 25 iku kunsil ke udah dipadu Parti Barisan National.