Iban - Found on mysarawak.org. Posted on Saturday, March 15, 2008 - 10 Comments

4,000 orang bekebun sawit ditinggang penanggul

Sida enda tetangkup rega baja enggau rachun ke niki

MIRI: Lebih 4,000 bala orang bekebun mit sawit di menua Suai enggau Niah benung keran minta perintah ngambika netap benih tauka leka sawit, baja enggau rachun rumput nyadi barang kontrol rega iya ulih perintah.

Bala sida orang bekebun enggau orang bumai nya balat endar kemplin rega tiga bengkah barang tu ??? leka tauka benih sawit, baja enggau rachun rumput ??? balat endar engkejuk niki rega, iya nya entara 50 ngagai 70 peratus bebanding enggau taun baru nyin suba. Beduduk ari nya, bala raban sida tu madah sida nadai tentu mayuh untung agi baka ngelamatu.

Sida keran minta Opis Menteri Industri Ladang enggau Komoditi sereta mega Opis Menteri Dagang Dalam Menua enggau Pekara Pengguna ngambika sama betati sereta enggau naka ulih mutar penanggul rega barang nya ke balat niki baka ke dijual ba sekeda kedai ke dipadu enggau bala orang bedaja.

“Diatu rega rachun rumput nyau dua kali lipat bebanding enggau rega taun dulu, iya nya bala rachun rumput chap Century taun nyin suba berega lebih mimit ari RM100 (ungkup 4 liter) tang diatu nyau manggai ngagai RM210 ungkup penyampau liter ti sama,” ku Kr. Jadan Ekim, umur urung 50 taun lebih, ari Kampung Jambatan Suai.

Ku iya nampung jaku: ” Barang nya jauh endar niki, lalu balat mangki bala orang bekebun mit, lalu bala kami ngarapka perintah ulih mantu ngurangka penanggul kami besangkut paut enggau rega ke niki nya,” ku iya madah lebuh bejaku ngagai Utusan Borneo kemari.

Serimbai enggau nya, iya mega madah rega ke tinggi nya sama nyangkut paut leka tauka benih sawit ke tambak sawit umur 10 bulan berega RM7.50 bulan dulu tang diatu tambak sawit umur 4 bulan ke berega nyampau nya (RM7.50). Nya alai kelalu bendar ga bala sida ke bedaja tambak sawit nya deka ngulihka untung jampat ari bala sida ke bekebun mit, ku iya.

Siku tuai rumah, iya nya TR Ugos Sugon, 70, siku bansa Penan ari Kampung Ugos Jambatan Suai Penan madah, enti perintah enda mutar enggau jampat rega sekeda barang ke niki, mayuh bala rayat ke sama keran deka ngemansangka diri idup betanam sawit deka puntan dalam pengawa sida laban rega ke barang besangkut paut enggau pengawa nanam sawit tu balat majak niki.

“Nya alai enti pekara nya (barang majak niki rega) ditejuka perintah ngapa, tuju perintah ke meransang bala rayat mayuh enggau masuk dalam pengawa bekebun sawit tu deka nyadi puntan. Kebuah pia, laban bala kami ke bekebun nyau nadai agi penguntung beduduk ari rega barang kelalu mar,” ku TR Ugos.

Siku agi orang bekebun sawit, iya nya siku bansa Iban penama

Unges ak Jam ke berasal ari Sungai Selabek Ulu Suai ke empu kebun sawit bisi 10 hekta pemesai, madah iya nadai bulih penguntung belanja ari bekebun sawit. Kebuah pia nya laban rega baja enggau rachun rumput balat endar niki, tang rega sawit mengkang tan diri lalu nadai berupai niki bebanding enggau taun dulu.

“Taun siti tu tadi, kami agi ulih meli semua barang nya, tang diatu rega iya nyau kelalu mar, lalu minta perintah betatika penanggul kami tu,” ku Unges.

Iya madah, diatu pengawa bepilih nyau udah tembu dipejalai, tang rega barang tu nyau majak niki, lalu bala orang ke nadai jalai belanja balat endar kena pangki penanggul barang niki rega tu.

Nyadi diatu, bisi 4,300 bala orang ke bekebun mit udah nguji nasit diri dalam pengawa betanam sawit di menua Suai enggau Niah.

Penyampau sida nya kira raban ke pemadu besai dipegulai dalam pengawa nanam sawit kebun mit di Sarawak.

10 Comments

You can follow any responses to this entry through the RSS 2.0 feed. You can leave a response, or trackback from your own site.

assd
Apr 16, 2008 11:25

selamat pagi nagai semua pemacha ke bisi meda ditu.keterubah tu aku minta ampun enti nyema jako aku bisi salah ba ati kita.bagi aku,kitai ti muka nursery tauka nyual anak sawit sigi patut enggau rega ti tinggi.kebuah pia laban rega baja enggau racun kemaia ari tu telalu amat tinggi bebanding enggau suba.aku sigi nyukung rega anak sawit di jual enggau rega ti tinggi tang enda tau lebih ari RM15.kitai sama nemu rega baja sigi lebih ari seratus ringgit seguni 50kg

semalau
Jun 22, 2008 12:35

Tu meh pemanah perintah pegai Pak Lah. Semua utai niki rega. Enda lama da agi, kada enda bisi cukai ngena sungai.

Evelyn M
Jul 7, 2008 11:20

Tabi basa ngagai kitak ke bekebun mit sawit disarawak.

Enti kitak bc deka minta/ulih ngudar enggau jumlah ti besai baja tu, aku ulih ngimport baja tu (organik) ti lebih murah sereta udah ditemu manah guna ngagai sawit di menoa semenanjung ditu.

Tu siti cara kitai betulung sama bangsa.

beri komen kitak ti setuju.

Endu Evelyn (Selangor)
019-6917162

kdumpai
Jul 18, 2008 16:06

endu evelyn, trima kasih penemu nuan ti madah ke diri deka nguji nulung bansa kitai ba utai ke dipadah nuan nya. Enti amat nya ulih diadu, manah amat nya. 1)Laban nuan berani deka nguji. 2)Kena ngurang ke penanggul penanam sawit kebun mit.
Tang, berapa rega deh? Sebedau kami ulih meli, beri le iklan dulu….. k tq.

Evelyn M
Aug 15, 2008 17:05

Minta ampung Kdumpai,
Ngau lama enda meda web tu, nemu bc ga orang reply. Thank for your reply.

Rega baja nya disemenanjung ditu bakatu :
RM 70/50kg. own collection.
Ti kitai ngambi ari kilang ia empu (Indonesia/Philipines) jauh murah ti terus di export ke sarawak.
RM 80 /50kg lebih ari cukup kena nampung kos kasar baka transportation, insuran e.tc.
Enda datai 100 pelaba aku. Tang janji besai quantity aja.

Baja tu baja organik - GUNUNG BERAPI.
bakani penemu kitak ?

Mr.Roger S
Aug 19, 2008 13:45

Kami gawa ba tasik Diamond ocean Shield amat nyukung penuh ka sebana bala kebekebun sawit suai niah pasal rega baja enggau racun sekumbang ka uadah berpilih besai bebarapa bulan ka udah lalu. ngelama tu perintah amat bebendar ngansak rakyat ba rumah panjai betanam ka sawit enggai ka tinggal pemansang laban menua bukai kelebih agi baka menua adap ke Indonesia,.

Sekumbang pemansang betanam bertupi ba rumah panjai uah mujur, tang rega barang baka baja ,racun rumput tekelalu amat deras niki lalu ngelemah ka semengat orang ka bertanam bertupi nyau berubah pengerindu ba pengawa berkebun sawit laban nadai nganti pengelelak kanurun pagi enggau lemai.

Ngarap ka perintah mutar ka pengawa bangsa tu enggau jampat agi awak ka rakyat ngasai bakani iya ka janji Dr.Mathair Mohd taun Wawasan 2020. (Mr.Roger S )+From Belumut Platform,,,,,,,,,,,,,?

Evelyn M
Aug 20, 2008 12:13

Agi lama ti nganti perintah ke diatu mutar ke pengawa tu, sida mina maioh agi belakon ba tv tauka news ari ke jaga pemansang rayat. Bc pemansang tang ukai untuk rayat menoa pesisir, tang lebih agi ngenusah ke rayat menoa pesisir.

Beduruk ari nya, anang agi kitai nganti…..tang giga jalai ke muntang, nyeliah diri ari nengah jalai ke bebelit.

Eric K
Oct 8, 2008 16:28

Aku setuju ngau kita pasal harga baja,racun ti jauh amat niki, tp kami di BT.NIAH ukai semina baja,racun aja niki, hampir semoa utai niki cth: sayap manok 800gm RM10.50! ti meli 2kg RM21.00
murah ke mahal? aku harap perintah mansik harga barang engau silik agi, laban bala cina ka bejual sigi untung berlipat ganda ngau harga sayap manok/manok hidup ka di jual sida, tang sapa tusah? rakyat juga yg susah… aku arap ka perintah turunlah..ke padang mansik harga barang kami di niah ditu. thank you

Pantak
Oct 13, 2008 23:16

Kasih meh ninga sebana bala kita ke nanam sawit ketegal rega baja enggau racun ti manjak mal.
Tak ngiga cara kediri meh kitai wai laban bala menteri kita enda meda kitai. Leboh ka bepilih baru sida ngiga kitai.Enti penusah bangsa kitai enda sida nemu. Tanah rimba temuda kitai ambi kompeni besai pan sida enda ulih nulong laban perut sida menteri kitai udah kenyang. pedis ati meda bangsa kitai dikemeli ka orang. Apa boleh buat.

Terima kasih…renung renungkan
(Kuala Lumpur)

sawit rumbau
Oct 17, 2008 21:37

sekumbang rega baja enggau racun niki ditambah enggau rega sawit nyau berengkah nurun ke diatu…amat ngenusah ke bala orang ke bekebun mit …tambah agi ngagai cda ke baru ka numboh ke kebun sawit. ketegal ke rega baja enggau racun ti niki ..semangat sida ke deka numboh kebun sawit tu nyau lemahr ..kami arap ke perintah ulih mansik perkara tu enggau silik agi …lalu meri jalai ngasoh rega barang bakatu ulih nurun enggau ulih dibeli orang enggau rega ke patut.

kebun mit….
orang niah